Генерал-майор Иван Панфиловдун эстелигинин расмий ачылышы
Central Asia Capital тике инвестициялар фонду реставрациялоонун негизги аткаруучусу катары чыкты
Мария Карнакова
20-майда Панфилов айылында маанилүү окуя — Улуу Ата Мекендик согуштун баатыры жана легендарлуу аскер башчысы Иван Васильевич Панфиловдун калыбына келтирилген эстелигинин салтанаттуу ачылышы болуп өттү.
Мемориалды калыбына келтирүү үстүндө Central Asia Capital түз инвестициялар фонду, Кыргыз-Орус Славян университети жана «Дубровин» куюучу өнөрканасы РФнын Кыргызстандагы Элчилигинин жана Панфилов районунун акимиатынын колдоосу астында биргелешип иштешти.
Иш-чаранын ардактуу коногу катары аскер башчысынын небереси — Казакстандын Куралдуу Күчтөрүнүн Улуттук аскердик-патриоттук борборунун башчысынын орун басары Алуа Байкадамова катышты.
Ошондой эле иш-чарага РФнын Кыргызстандагы Атайын жана Ыйгарым укуктуу Элчиси Сергей Вакунов, КР Президентинин Чүй облусундагы ыйгарым укуктуу өкүлүнүн кеңешчиси Самат Кожобергенов, КОСУнун ректору Сергей Волков, Панфилов районунун Ардагерлер кеңешинин төрагасы Курманкалый Орозов, Central Asia Capital фондунун командасы, ошондой эле ардагерлер, жаштар жана райондун тургундары катышышты.
Россия Федерациясынын Элчиси Сергей Вакунов өз сөзүндө эстеликтин ачылышы Россия менен Кыргызстандын элдеринин жалпы тарыхый эс тутумунун маанилүү символу экенин белгиледи. «Жоокерлер Москванын босогосунда турган 1941-жылдын катаал күндөрүндө, дал ушул кыргыз жергесинде Иван Васильевич Панфиловдун жетекчилиги астында 316-аткычтар дивизиясы куралган. Анын негизин Ата Мекенди коргоо деген бирдиктүү максаттын айланасында бириккен ар улуттун өкүлдөрү түзгөн», — деп баса белгиледи ал.
Салтанаттуу аземдин жүрүшүндө Сергей Вакунов Россия менен Кыргызстандын жалпы тарыхый мурасын сактоого жана байытууга кошкон жеке салымы жана активдүү жарандык позициясы үчүн Central Asia Capital директорлор кеңешинин төрагасы Антон Собинге ыраазычылык кат тапшырды.
Азем гүл коюу жана бир мүнөттүк унчукпоо менен коштолду. Коноктор үчүн атайын «Кыргызстан Улуу Ата Мекендик согуш жылдарында» аттуу көргөзмө жана «Панфиловчулар» мультимедиялык долбоору уюштурулду. Ал эми расмий бөлүктөн кийин катышуучулар 1964-жылы негизделген И. В. Панфилов атындагы тарыхый музейге барышты.
